ՀՀ արտաքին գործերի նախարար, Ֆրանկոֆոնիայի նախարարական համաժողովի նախագահ Էդվարդ Նալբանդյանի խոսքը ՖՄԿ նախարարական հանդիպման արդյունքներին նվիրված ասուլիսին
27.11.2017

Այսօր ստանձնելով Ֆրանկոֆոնիայի նախարարական համաժողովի նախագահությունը՝ առաջին հերթին ցանկանում եմ շնորհակալություն հայտնել Մադագասկարին նախագահության երկու տարիների ընթացքում իրականացված փայլուն աշխատանքների համար:

Տիկնա՛յք և պարոնայ՛ք,

Գագաթաժողովը տեղի է ունենալու 2018թ․ հոկտեմբերի 11-12-ին։ Որպես 17-րդ Գագաթաժողովի խորհրդանշան (լոգո)՝ ի շարունակություն Երևանի նախարարական համաժողովի, ընտրվել է նուռը, որը հայկական մշակույթում խորհրդանշական համարում ունի։

Նախատեսում ենք կազմակերպել նաև «Ֆրանկոֆոնիայի ավան», ուր համապատասխան տաղավարներով իրենց ժողովուրդների մշակութային բազմազանությունը, արհեստներն ու արվեստն են ներկայացնելու Ֆրանկոֆոնիայի միջազգային կազմակերպության անդամ երկրները։ «Ֆրանկոֆոնիայի ավանը» տեղակայված կլինի մայրաքաղաքի կենտրոնում, Երևանի սրտում, որի 2800-ամյակի տոնակատարությունները կնախորդեն գագաթաժողովին։

Որպես գագաթաժողովի հիմնական կարգախոս՝ առաջարկում ենք «Ապրել միասին» թեման։ «Ապրել միասին՝ հարգելով մարդասիրական արժեքներն ու բազմազանությունը՝ իբրև խաղաղության և բարօրության հիմք ֆրանկոֆոն տարածաշրջանում»։

Գագաթաժողովը կներառի այլ առաջնային թեմաներ նույնպես՝ մշակութային բազմազանություն, թվային ֆրանկոֆոնիա, կանանց և տղամարդկանց իրավահավասարություն, ինչպես նաև կայուն զարգացում, կլիմայական փոփոխությունների դիմակայում և այլն։

Տիկնա՛յք և պարոնա՛յք,

Առաջարկում եմ Ձեզ դիտել Երևանի գագաթաժողովի նախապատրաստման մասին կարճ ֆիլմը, որը Ձեզ ընդհանուր պատկերացում կտա Հայաստանի՝ Ֆրանկոֆոնիայի 17-րդ գագաթաժողովը հյուրընկալող երկրի մասին, ինչպես նաև գագաթաժողովի անցկացման պայմանների, նիստերի անցկացման վայրի, ենթակառուցվածքների և գործնական այլ հարցերի վերաբերյալ։

   ՀՀ արտաքին գործերի նախարար, Ֆրանկոֆոնիայի նախարարական համաժողովի նախագահ Էդվարդ Նալբանդյանի խոսքը ՖՄԿ նախարարական հանդիպման արդյունքներին նվիրված ասուլիսին